Joriy yilning 7 sentabr kuni «Trastbank» xususiy aksiyadorlik bankining Amaliyot boshqarmasiga qarashli «Taraqqiyot» bank xizmatlari markazi (Manzil: Toshkent viloyati, Toshkent tumani, Iqbol massivi, Yoshlik ko‘chasi, 1-uy. Mo‘ljal: Katta xalqa yo‘li yoqasi, Yunusobod tumani, 18-daha ro‘parasidagi qurilish mollari bozori hududi, telefon: +99871 223-45-76) o‘z ish faoliyatini boshladi.
Mazkur bank xizmatlari markazi aholi va tadbirkorlik sub’ektlariga barcha turdagi bank va konsalting xizmatlarini ko‘rsatadi.
Mazkur markaz O‘zbekiston Respublikasi Prezidentining 2019 yil 13 avgustdagi “Xususiy mulkni himoya qilish va mulkdorlar huquqlarining kafolatlarini kuchaytirish, tadbirkorlik tashabbuslarini qo‘llab-quvvatlash borasidagi ishlarni tashkil qilish tizimini tubdan takomillashtirish bo‘yicha qo‘shimcha chora-tadbirlar, shuningdek, tadbirkorlik sub’ektlarining moliyaviy resurslari va ishlab chiqarish infratuzilmasidan foydalanish imkoniyatlarini kengaytirish to‘g‘risida”gi PQ-5780-sonli Farmoni ijrosi doirasida jumladan, aholi va tadbirkorlarning ishonchini qozonish, ularga ko‘makdosh bo‘lish va chakana biznesning zamonaviy xizmatlarini ko‘rsatish maqsadida tashkil etildi.
Xususan, markazda jismoniy shaxslar uchun qulay shartlarda avtokredit, mikroqarz, overdraft va boshqa kreditlarni rasmiylashtirish hamda plastik kartalar ochish, qolaversa dunyoning istalgan nuqtasiga xalqaro pul o‘tkazmalarini amalga oshirish imkoniyatlari yaratilgan.
Shuningdek, markazda tadbirkorlar uchun mutaxassislar maslahatini olish, hisob raqam ochish va kredit olish uchun ariza berish imkoniyati yaratilgan.
Bank xizmatlari markazi 24/7 rejimida faoliyat ko‘rsatuvchi zamonaviy bankomat va infokiosklar bilan ta’minlangan. Markaz bozor hududida joylashganligini hisobga olib, bozorga tashrif buyurgan aholi va tadbirkorlar haftaning istalgan kuni, sutkaning istalgan vaqtida milliy va xalqaro plastik kartalaridagi mablag‘larini naqdlashtirishi, kommunal, uyali aloqa operatorlari, shahar telefonlari, kabel televideniyesi, internet xizmati uchun to‘lovlarni amalga oshirishi mumkin.
Markaz binosi xalqaro standartlar asosida ta’mirlanib, ilg‘or kommunikatsiya vositalari hamda zamonaviy mebellar bilan jihozlandi.
Endilikda mazkur bank xizmatlari markazining bozor hududida faoliyat yuritishi bilan tadbirkorlarning vaqti ham tejaladigan bo‘ldi.
