Kelajak avlod haqida qayg‘urish, sog‘lom, barkamol insonni voyaga yetkazishga intilish xalqimizga xos milliy xususiyatlardandir. Xususan, “Trastbank” xususiy aksiyadorlik banki ham o‘z faoliyati davomida yosh avlodni har tomonlama yetuk, salohiyatli, komil insonlar etib tarbiyalashga o‘z hissasini qo‘shib kelmoqda.
An’anaga muvofiq, 2023-2024 yangi o‘quv yili boshlanishi munosabati bilan moliya muassasasining bosh ofisida “Trastbank” xodimlarining 1-sinfga qadam qo‘yayotgan bolajonlari uchun “Salom, maktab” shiori ostida bayram tashkil etildi.
Unda “Trastbank” XAB Boshqaruvi Raisi Sardor Normuhamedov so‘zga chiqib, bolajonlarni yaqinlashib kelayotgan yangi oʻquv yili bilan samimiy muborakbod etdi hamda ularga maktabda beriladigan yangi bilimlarni osonlik va ishtiyoq bilan o‘rganishlarini, ilk o‘quv yili qiziqarli voqealarga boy, yangi g‘alabalar va yutuqlarga to‘la bo‘lishini tiladi.
Tadbirda bolajonlarga barcha o‘quv qurollari jamlangan maktab sumkasi va esdalik sovg‘alari taqdim etildi. Shuningdek, sahna ko‘rinishlari hamda qiziqarli interaktiv o‘yinlar jajjigina yurakchalari bir olam quvonchga toʻlgan bolajonlarga bir olam zavq va shavq bagʻishladi.
