Joriy yilning 18-aprel kuni “Trastbank” xususiy aksiyadorlik bankining Toshkent shahri Yunusobod tumani “Moyqo‘rg‘on” ko‘chasi 39-uyda joylashgan “Turkiston” bank xizmatlari markaziga noma’lum shaxs tomonidan hujum uyushtirilgan edi. Ushbu bosqinchilik harakati vaqtida Dinora Nuritnidova va Sayyora Rustambekova jasorat ko‘rsatgandi. Ya’ni ularning yuborgan “tashvish” signali orqali Qo‘riqlash xizmati xodimlari darhol voqea joyiga kelib, gumondorni qo‘lga olgandi.
D.Nuritdinova va S.Rustambekova xizmat vazifalarini bajarish vaqtida fidokorlik ko‘rsatib, ish jarayonida favqulodda holatda ham tezkorlik va oqilona qaror qabul qilishi bilan barcha hamkasblar, ayniqsa, yosh avlodga o‘rnak bo‘ldi.
“Darxon” bank xizmatlari ofisida o‘tkazilgan tadbirda ularning ushbu jonkuyarligi alohida e’tirof etildi. “Trastbank” XAB Boshqaruv raisi o‘rinbosari Z.Kurganov moliya muassasasi rahbariyati va xodimlari nomidan D.Nuritdinova va S.Rustambekovaga minnatdorlik bildirib, butun jamoa ular bilan faxrlanishini ta’kidladi hamda sihat-salomatlik va muvaffaqiyatlar tiladi.
Shuningdek, “Turkiston” BXMning jasoratli xodimlari – Dinora Nuritnidova va Sayyora Rustambekovaga tashakkurnoma va esdalik sovg‘alari topshirildi.
