2024-yil 14-mart kuni “Trastbank” xususiy aksiyadorlik banki Bosh ofisida Bank xodimlari uchun “Jaholatga qarshi ma’rifat” mavzusida tadbir bo‘lib o‘tdi. Unda Bosh bank mutasaddilari va mutaxassislari hamda videokonferensaloqa orqali hududlardagi Bank xizmatlari ofislari xodimlari ishtirok etdi.
Ushbu ma’naviy tadbirda O‘zbekiston xalqaro islom akademiyasi o‘qituvchisi, tarix fanlari bo‘yicha falsafa doktori Shuhrat Toxtiyev tomonidan har bir kishining, ayniqsa, yosh avlodning komil inson bo‘lib voyaga yetishida diniy va dunyoviy bilimlarning ahamiyati yuzasidan ma’ruza qilindi.
Bundan tashqari, bugungi axborot almashinuvi davrida turli yot g‘oyalardan ogoh bo‘lish, haq qanday jaholatga qarshi ma’rifat bilan javob berish zarurligiga urg‘u berildi. Qolaversa, muqaddas islom dinining insonparvarlik, tinchlik va do‘stlik kabi olijanob maqsadlarga xizmat qilishi ta’kidlandi.
Shuningdek, Ramazon oyining fazilatlari, to‘g‘ri ovqatlanish bilan bog‘liq muhim maslahatlar berildi. Tadbir ishtirokchilarini qiziqtirgan savollariga atroflicha javob qaytarildi hamda turli diniy ekstremistik g‘oyalardan ogoh bo‘lishga chorlovchi videolavha namoyish etildi.
