Avval xabar berilganidek, shu kunlarda mamlakatimiz bo‘ylab O‘zbekiston Respublikasi Markaziy banki tashabussi bilan “Umumjahon pul haftaligi – 2026” tadbirlari o‘tkazilmoqda. “Trastbank” xususiy aksiyadorlik banki ham mazkur jarayonlarda faol ishtirok etib, mahallalar ahli, o‘quvchi-yoshlar, talabalar ishtirokida turli uchrashuvlar tashkil etmoqda. Yosh-u keksani birdek qamrab olib, ularning moliyaviy savodxonligini oshirish borasida bir qator chora-tadbirlarni amalga oshirmoqda.
Poytaxtimizning “Al-Xorazmiy”, “Beshqayrag‘och”, “Beltepa”, “Bo‘ston”, “Iyk-ota”, ‘Kamolon darvoza”, “Gulobod”, “Majnuntol” mahallalarida bunyod etilgan kutubxonalarda faoliyat yuritayotgan mutaxassislar tomonidan ochiq darslar o‘tkazildi. Ularda ishtirok etgan hudud ahli, yoshlarga moliya-iqtisod siyosati, kreditlarning foyda va xatarlari haqida tushuntirish berildi.
Bundan tashqari, pul mablag‘larini jamg‘arib borish, raqamli iqtisodiyot va “onlayn banking” tartibi, kiberxavfsizlik qoidalari to‘g‘risida so‘z yuritildi. Qolaversa, volontyor guruh a’zolari tomonidan mazkur mavzularda taqdimotlar qilindi.
Shuningdek, faol ishtirok etgan yoshlar “Trastbank”ning esdalik sovg‘alari bilan taqdirlandi.
