Navbatdagi seminar kassa ishini tashkil etish, naqd pul va boshqa qimmatliklarni inkassatsiya qilish to‘g‘risida bo‘lib o‘tdi

Joriy yilning 2 fevral kuni “Trastbank” xususiy aksiyadorlik bankida Bank O‘quv markazi hamda Pul muomalasi va kassa ishini tashkil etish departamenti bilan hamkorlikda “Tijorat banklarida kassa ishini tashkil etish, naqd pul va boshqa qimmatliklarni inkassatsiya qilishga doir yo‘riqnomaga kiritilgan o‘zgartirish va qo‘shimchalar” mavzusida seminar tashkil etildi.

Tadbirda so‘zga chiqqan Pul muomalasi va omonat amaliyotlari boshqarmasi boshlig‘i Akbarjon Atajonov seminar qatnashchilariga Bankda naqd pullar va boshqa qimmatliklar bilan kassa operatsiyalarini bajarish, bank kassasidagi naqd pul va boshqa qimmatliklarni but saqlash hamda ularni tashish, bank kassa tarmog‘i hamda bank binosi va binodan tashqarida kassalarni qurish, jihozlash va qo‘riqlash bo‘yicha tushunchalar berdi.

Shuningdek, kassalarda naqd pul va boshqa qimmatliklar bilan ishlash (sanash, saralash, o‘rab-bog‘lash va kassa operatsiyalarini bajarish), ularning but saqlanishini ta’minlash masalalari bo‘yicha yo‘riqnomaga kiritilgan o‘zgarish va qo‘shimchalar haqida ma’lumot berdi.

Seminar qatnashchilari o‘zlarini qiziqtirgan savollarga tegishli javoblar oldilar.