“Bank xizmatlari iste’molchilari bilan o‘zaro munosabatlarni amalga oshirishda tijorat banklarining faoliyatiga qo‘yiladigan minimal talablar to‘g‘risida”gi 3030-sonli Nizomga kiritilgan o‘zgartirishlar joriy yilning 30-yanvar kunidan boshlab kuchga kirgan edi. Ta’kidlash joizki, ushbu hujjat bank bilan mijoz o‘rtasidagi munosabatlar shaffofligini ta’minlashda muhim ahamiyat kasb etmoqda.
“Trastbank” xususiy aksiyadorlik banki o‘z ish faoliyatini mazkur Nizom talablari asosida olib borishga ustuvor ahamiyat qaratib, bir qator chora-tadbirlar amalga oshirib kelmoqda.
Joriy yilning 13–17-aprel kunlari “Trastbank” XAB Boshqaruv Raisi Kotibiyati rahbari S.Bekchanov rahbarligida “Buxoro”, “Samarqand” va “Jizzax” bank xizmatlari ofislarida yig‘ilish bo‘lib o‘tdi. Unda mijozlarga yuqori saviyada xizmat ko‘rsatilishini ta’minlash, murojaatlarda keltirilgan masalalar yuzasidan har bir xodimning kasbiy mas’uliyatini oshirish masalalari muhokama qilindi. Qolaversa, “Sirli mijoz” tadbirlari davomida aniqlangan xato va kamchiliklar tanqidiy ko‘rib chiqildi.
Bundan tashqari, ushbu masalalar bo‘yicha Bosh bank tegishli tarkibiy tuzilmalari rahbarlarining hisobotlari tinglandi. Shuningdek, bank xizmatlari ofislarining barcha xodimlariga zaruriy ko‘rsatma, topshiriq hamda tushuntirishlar berildi.
